WAARMEE IS JY BEREID OM SAAM TE LEEF?
Die fluitjieblaser se bewerings in The New York Times was verdoemend, gestaaf deur lywige uitgelekte dokumente. In die spervuur was sosialemedia-reus Facebook met beskuldigings van gevoelloosheid teenoor die welsyn van sy gebruikers. Mark Zuckerberg, Mnr. Facebook, se onmiddellike reaksie? ’n Dawerende stilte. Wag. Hy het wel foto’s op sy sosialemediaprofiel geplaas van hom op sy luukse jag en waar hy staan en skerm. Praat van ’n middelvinger wys. Met Frances Haugen, ’n voormalige werknemer van Facebook, se latere verskyning voor ’n subkomitee van die Amerikaanse senaat het Zuckerberg uiteindelik gereageer met ’n verklaring op Facebook. Daar is gemor dat hy Facebook geen guns bewys het deur so lank stil te bly nie. (Facebook se moedermaatskappy het natuurlik nou ’n nuwe naam, Meta. Met die plan om ’n “metaverse”, oftewel meta-heelal, te skep.
44 | Januarie/Februarie 2022
SARIE.com
Kritici sê sarkasties dié fantasiewêreld moet ons help vergeet wat Facebook aan ons bestaande werklikheid gedoen het.) Op eie bodem: “Waar is Cyril?” het mense tydens die inperking gemurmureer. “Hier sit ons in ons huis gekluister en ons hoor net so af en toe van ons president. As hy net meer met ons wil práát!” Natuurlik was daar die nou bekende “familiebyeenkomste” op TV wat Cyril Ramaphosa gewoonlik begin met: “Mede-Suid-Afrikaners”. Onse president op ’n afstand, formeel met sy alomteenwoordige iPad. Soms het hy lippe-teen-die-klippe gelyk, en wie kan hom kwalik neem? “Ons moet aanvaar leiers is nie alwetend nie en soms onseker. Maar deursigtigheid is belangrik vir vertroue en om spekulasie die mond te snoer,” sê prof. Renata Schoeman, psigiater en medeprofessor aan die Universiteit Stellenbosch se bestuurskool.
Foto’s Getty Images/Gallo Images
PRAAT JY SWYG JY
