153
PÁIRCEANNA AGUS ÁINEAS Aithníonn Comhairle Contae Shligigh a thábhachtaí atá soláthar leordhóthanach spásanna oscailte atá suite go háisiúil ar fud na cathrach. Mealltar daoine le cur fúthu, dul i mbun oibre, teacht ar cuairt, agus infheistíocht a dhéanamh i limistéir ina bhfuil bonneagar áineasa glas ardchaighdeáin ar fáil. Leag an phaindéim béim ar a thábhachtaí atá an bonneagar seo, ní hamháin chun críocha áineasa ach ar mhaithe lenár sláinte agus lenár sábháilteacht chomh maith. Leanann Comhairle Contae Shligigh d’fhorbairt páirceanna agus bonneagair áineasa do Shligeach a chur chun cinn agus d’infheistíocht a dhéanamh ann. Bíonn dúshláin ag baint leis an soláthar cistiúcháin le haghaidh bonneagar agus cothabháil páirceanna, ach tá na comhaltaí tofa agus an fhoireann feidhmiúcháin tiomanta i gcónaí do bhonneagar glas ardchaighdeáin a fhorbairt agus a chothabháil. Leanfaidh an tSeirbhís Páirceanna, i gcomhairliúchán agus i gcomhar leis an bpobal, d’fheabhas a chur ar cháilíocht agus ar áilleacht na timpeallachta áitiúla. Lean an tSeirbhís Páirceanna de bhainistiú agus de chothabháil a dhéanamh ar réimse áiseanna atá ag dul i méid, lena n‑áirítear Páirc Dhúirle, Páirc Réigiúnach Chliabhraigh, Páirc Chnoc an Dúin, Páirc Mitchell Curley, Faiche an Aonaigh, Páirc Radharc na Mara, Promanáid Chéide Radharc na Mara, Salmon Point agus Faiche an Aonaigh. Anuas ar na páirceanna, agus le fáil i gcuid díobh, tá 11 pháirc imeartha, 6 áit súgartha, 6 MUGA, trealamh aclaíochta faoin spéir, cosáin agus rianta siúlóide/bogshodair/rothaíochta, limistéir áineasa, réimse limistéar tírdhreachaithe uirbeacha, 33 acra de spás oscailte atá tírdhreachaithe agus forbartha i bpáirt, agus 290 acra de spás oscailte neamhfhorbartha lena gcuimsítear coillearnach agus cosáin agus talamh féaraigh talmhaíochta neamhfhorbartha. Cuimsítear leis an obair chothabhála a rinne Rannóg na bPáirceanna i limistéir spáis oscailte gníomhaíochtaí amhail baint féir, bailiú bruscair, cothabháil agus feabhas ar limistéir thírdhreachaithe, cothabháil ar sconsaí, bainistiú agus cur crann, agus cothabháil ar shéadchomharthaí agus ar throscán páirceanna, agus leanadh de na gníomhaíochtaí sin go léir in 2020.
Bithéagsúlacht
Chruthaíomar roinnt cluainte bláthanna fiáine taobh le bóithre agus i bpáirceanna. Cuimsítear leis sin bláthanna fiáine a chur agus limistéir féir a bhainistiú trí theorainn a chur leis an líon uaireanta a bhaintear an féar sa bhliain. Déantar limistéir eile a bhainistiú de réir an mhana “Ná bain an féar – bíodh sé ag fás”. Mar thoradh ar an bhféar a bhaint níos déanaí san earrach agus go luath sa samhradh, tá borradh faoi bhláthanna áirithe, an caisearbhán go háirithe. Tá bláthanna fiáine ag fás go nádúrtha taobh le roinnt cosán srl. Chuireamar freisin leis an méid plandaí a thaitníonn le pailneoirí a bhíonn á gcur i nGairdín na mBeach againn. Ligeamar don tsaileach agus don aiteann teacht chun cinn agus leathnú amach i limistéir chuí sna páirceanna agus sna spásanna oscailte. Plandaí is mó a thaitníonn leis na pailneoirí a chuireamar inár mboscaí bláthanna uirbeacha – antairíneam, lus buí Francach, tormán léana, cosmos srl – agus chuireamar crainn dhúchasacha óga lena n‑áirítear an cárthann agus an donnroisc. Chuireamar leis an méid bláthanna san earrach agus go luath sa samhradh sna páirceanna agus ar thaobh an bhóthair, lena n‑áirítear níos mó bláthanna a thaitníonn le pailneoirí amhail dáthabha dubh, plúirín sneachta, cróch, hiasaint agus cineálacha allium.
TUARASCÁIL BHLIANTÚIL CHOMHAIRLE CONTAE SHLIGIGH, 2020
